کراچی کے علاقے احسن آباد میں ساتویں منزل پر واقع ایک فلیٹ سے ڈاکٹر، ان کی اہلیہ اور تین بچوں سمیت پانچ افراد کی کئی روز پرانی لاشیں برآمد ہوئی ہیں۔
آئی جی پولیس کے مطابق فلیٹ سے برآمد ہونے والی لاشوں کی شناخت ڈاکٹر عمران، ان کی اہلیہ اور ان کے تین بچوں کے نام سے ہوئی ہے۔ پانچوں افراد کی لاشیں کئی روز پرانی ہیں۔ ڈاکٹر عمران اور ان کی اہلیہ کی لاشیں فلیٹ کے ایک کمرے جبکہ تینوں بچوں کی لاشیں دوسرے کمرے سے ملیں۔
واقعے پر وزیراعلیٰ سندھ سید مراد علی شاہ نے نوٹس لیتے ہوئے آئی جی پولیس سے رپورٹ طلب کرلی۔ وزیراعلیٰ سندھ نے پانچ افراد کی ہلاکت پر افسوس کا اظہار کرتے ہوئے واقعے کی مکمل اور شفاف تحقیقات کی ہدایت کی ہے۔
وزیراعلیٰ سندھ نے کہا کہ واقعے کے تمام پہلوؤں کا جائزہ لیا جائے اور اگر کسی مجرمانہ کارروائی کے شواہد ملیں تو ذمہ داروں کو قانون کے کٹہرے میں لایا جائے اور سخت قانونی کارروائی کی جائے۔
دوسری جانب وزیر داخلہ سندھ ضیاءالحسن لنجار نے بھی احسن آباد فلیٹ سے پانچ افراد کی لاشیں ملنے کے واقعے پر تفصیلات طلب کرلی ہیں۔
وزیر داخلہ سندھ نے ایس ایس پی ایسٹ کو ابتدائی پولیس کارروائی اور ایکشن سے فوری طور پر آگاہ کرنے کی ہدایت کی ہے۔ ضیاءالحسن لنجار نے کہا کہ واقعے کی تفتیش و تحقیق کے حتمی نتائج سامنے لائے جائیں۔
انہوں نے ہدایت کی کہ جائے وقوعہ سے حاصل ہونے والے عینی اور واقعاتی شواہد کو مدنظر رکھتے ہوئے واقعے کے پس پردہ عوامل اور محرکات کا پتہ لگایا جائے۔
وزیر داخلہ سندھ نے ایس ایس پی ایسٹ کو اپنی نگرانی میں تفتیش مؤثر اور مربوط بنانے اور واقعے کی تفتیش و پیش رفت سے لمحہ بہ لمحہ آگاہ رکھنے کی ہدایت بھی کی ہے۔
پولیس حکام کے مطابق واقعے کی مزید تفتیش جاری ہے جبکہ لاشوں کی موت کی حتمی وجہ جاننے کے لیے قانونی اور فرانزک کارروائی بھی کی جا رہی ہے۔
