سوسائٹی آف اوبسٹیٹریشینز اینڈ گائناکالوجِسٹس آف پاکستان (SOGP) نے سوبھراج میٹرنٹی اسپتال میں سروائیکل کینسر سے آگاہی اور ایچ پی وی ویکسینیشن کے آغاز کے موضوع پر سمپوزیم کامیابی سے منعقد کیا۔ یہ تقریب جمعرات 14 ستمبر 2025 کو ہوئی اور مائیکروسافٹ ٹیمز کے ذریعے آن لائن بھی نشر کی گئی۔
تقریب سے خطاب میں ڈاکٹر اسماء نے سروائیکل کینسر سے بچاؤ کے لیے آگاہی اور احتیاطی تدابیر کی اہمیت اجاگر کی۔
پروفیسر تزین عباس، سیکرٹری جنرل SOGP نے ویکسین کی اہمیت پر روشنی ڈالی۔ انہوں نے والدین پر زور دیا کہ وہ اپنی بیٹیوں کے بہتر مستقبل کے لیے یہ موقع ضرور حاصل کریں۔
پروفیسر اقبال میمن نے 9 سے 14 سال کی بچیوں کے لیے ویکسینیشن کی ضرورت اور عام غلط فہمیوں پر بات کی۔
ڈاکٹر خالد اشرف نے بتایا کہ کس طرح NITAG نے ایچ پی وی ویکسین کو قومی پروگرام میں شامل کیا۔ انہوں نے صدر SOGP پروفیسر عزیزالنساء عباسی کے کردار کو سراہا اور کہا کہ پاکستان دنیا کا 150 واں ملک ہے جس نے یہ محفوظ اور دیرپا ویکسین متعارف کرائی ہے جو پہلے ہی 149 ممالک میں استعمال ہو رہی ہے۔
ڈاکٹر مریم نعمان نے سروائیکل کینسر کے اہم حقائق اور اعداد و شمار پیش کیے اور والدین کو ویکسین لگوانے کی ترغیب دی۔
ڈاکٹر صدف جیفری نے سندھ میں ویکسینیشن کے اعداد و شمار شیئر کیے جبکہ ڈاکٹر فرحانہ میمن نے آر ایم این سی ایچ پروگرام کے تحت اسکول سے باہر بچیوں تک رسائی کی حکمت عملی بیان کی۔
تقریب کا اختتام ڈاکٹر سونیا کے شکریہ کے کلمات پر ہوا جنہوں نے مقررین اور تمام شرکا کا شکریہ ادا کیا۔
